01.07.2013, 11:12; Рубрика: З нагоды 
Бярэзінскі пакой-музей драўлянай лыжкі набывае ўсё большую вядомасць і заслужаную славу не толькі сярод жыхароў раёна, а і сярод многіх яго гасцей з розных куточкаў зямлі. Гаспадыня і ініцыятар стварэння музея, кіраўнік Народнага клуба майстроў, вядомая на Бярэзіншчыне творчая асоба Ганна Аляксандраўна Ждановіч час ад часу арганізоўвае у гэтай культурнай установе цікавыя мерапрыемствы.
Тут праходзяць розныя тэматычныя выставы і шматлікія выставы работ дэкаратыўна-прыкладнога мастацтва бярэзінскіх майстроў, а ў знамянальныя для ўсяго нашага народа святы – Дзень Перамогі і Дзень Незалежнасці Рэспублікі Беларусь – адкрываецца экспазіцыя рэчаў ваенных часоў, прысвечаная перамозе савецкіх воінаў над нямецка-фашысцкімі захопнікамі, дзе прадстаўлены рэчы з прыватнай калекцыі мужа Ганны Аляксандраўны Якава Аляксандравіча Ждановіча. Сярод іх – нямецкі радыёпрыёмнік, пілотка, кулямётная лента, нямецкая вілка, каска, рыдлёўка 1935 года вырабу і, канечне, лыжка з незвычайнай гісторыяй: яна выплаўлена з металу нямецкага самалёта… Чорна-белыя фотаздымкі 30-50 гадоў з архіву сем’яў Смольскіх-Ждановічаў таксама сталі часткай гісторыі і неад’емнай часткай ваеннай экспазіцыі… Але, як кажуць, лепш пабачыць на ўласныя вочы, чым сто разоў пачуць ад кагосьці.
Дзверы музея заўсёды адчынены для наведвальнікаў, усіх са шчырай усмешкай вітае прыгожая гаспадыня, знаток драўляных лыжак і цудоўны экскурсавод – Ганна Аляксандраўна. Не дзіўна, што кніга для водгукаў амаль штодзень папаўняецца шчырымі словамі падзякі за незвычайны створаны "вугалок”, які, напэўна, з часам стане адным з абавязковых пунктаў наведвання для турыстаў Бярэзіншчыны.
На здымках: Ганна Аляксандраўна ЖДАНОВІЧ дэманструе экспанаты музея; ваенная экспазіцыя.
Алена ГРОМАВА.
Фота аўтара.
| 
