Беразіно абзавялося суперлыжкай
На бярэзінскай зямлі ў гэтыя выхадныя славілі звычайную драўляную лыжку — трохметровы помнік паўсюднай рэчы хатняга ўжытку ўстанавілі ў райцэнтры. Кветкі, вінаград, якія ўпрыгожылі твор, сімвалізуюць сабой радасць, шчырасць і адкрытасць майстроў-стваральнікаў помніка — Яўгена і Паўла Осіпавых, Васіля Мурашкі і Аляксандра Паскробкі.
Адкрыццё помніка прымеркавалі да свята-конкурсу "Бярэзінскія лыжкары", што прайшоў другі раз. У гарадскім скверы сабраліся майстры-лыжкары Міншчыны не толькі прадэманстраваць сваё майстэрства, прыняць удзел у конкурсе, але і прапанаваць жыхарам горада і гасцям дакрануцца да гэтай на першы погляд няхітрай навукі — майстар-класы (а таксама, вядома ж, бойкі гандаль) праходзілі на працягу ўсяго свята.
Ганаровае права адкрыць помнік драўлянай лыжцы прадаставілі аўтару помніка Яўгену Осіпаву і маладому майстру, які працягвае традыцыі лыжкарства на Бярэзіншчыне, Паўлу Осіпаву.
Марына БЕГУНКОВА, фота аўтара.
Мінская вобл.
| 
