Гэта пытанне міжвольна ўзнікае ў падлеткаў, ужо натомленых адпачынкам у
летнія канікулы. Надакучылі ім рэчка, гульні на стадыёне, сустрэчы з
сябрамі ды і гульні за камп’ютарам. А так хочацца нечага цікавага і
карыснага, каб атрымаць пэўную ежу для разважанняў, каб з’явілася прага
ствараць і нечаму навучыцца. У такім выпадку раім наведаць пакой–музей
драўлянай лыжкі, што працуе па вуліцы Піянерскай горада. На працягу
ліпеня-жніўня тут наладжана некалькі разнастайных выстаў. Сярод
прапанаваных гледачу выстаў – пастаянна дзеючая дэманстрацыя экспанатаў.
Гэта драўляныя лыжкі самых розных памераў, лыжка з гербам нашага горада
і ўнікальная лыжка-вожык. Значная частка гэтых твораў зроблена рукамі
майстроў разьбы па дрэве Мінскай вобласці ў ходзе абласнога свята
"Бярэзінская лыжка”. Павінны зацікавіць маладых людзей і дзве новыя
выставы, якія аб’яднаны тэмай багатага мінулага Бярэзінскага краю.
Размова ідзе пра літаратурна-тэматычны куток пад назвай "Купец
рэвалюцыі”, прысвечаны ўраджэнцу Бярэзіншчыны Аляксандру Парвусу. Ён
больш вядомы тым, што ў свой час выдаткаваў грошы на арганізацыю Вялікай
Кастрычніцкай рэвалюцыі 1917 года самому Уладзіміру Леніну. З іменем
гэтага дзеяча звязаны не толькі цікавыя і захапляльныя гісторыі, але і
неверагодныя легенды пра яго вялізарнае багацце. Другая выстава
носіць назву "Скарбы мінулага”. Яе экспанаты – грашовыя знакі, манеты
царскага, савецкага і постсавецкага часоў. Каля сотні з іх прадстаўлены з
уласнай калекцыі гаспадыні пакоя-музея Ганны Ждановіч, яе сяброў і
калег. Не пакінуць дзяцей і падлеткаў раўнадушнымі таксама грашовыя
знакі канца ХІХ-пачатку ХХ стагоддзя.
Алена ЖДАНОВІЧ, апублікавана на старонках раённай газеты, 2011 год.
