Васіль Андрэевіч працуе над стварэннем драўляных лыжак вельмі плённа, за год робіць 200 штук і болей. Перадаць сваё уменне і майстэрства маладым - яго даўняя задума. У сакавіку вядомы многім бярэзінцам лыжкарэз правёў майстар-клас па вырабу драўлянай лыжкі для вучня гімназіі Цімафея Сінякова. На працягу гадзіны ў майстэрні кіпела праца. Цімафей уважліва слухаў і сачыў за работай майстра. Васіль Андрэевіч паказваў, як працаваць разцом, тапаром, маленькім рубанкам. Падказваў, што трэба рабіць, каб не сапсаваць нарыхтоўку, дзе больш выбраць, каб лыжка была глыбейшай - адным словам, раскрыў сакрэты свайго майстэрства. Цікавасць маладога хлопца да вырабу лыжак пацвярджае той факт, што лыжкарскае майстэрства працягвае жыць у новым пакаленні, што дзякуючы апантанасці Цімафея Сінякова захаваецца яшчэ адна традыцыя, не згубіцца тэхналогія вырабу драўлянай лыжкі. Ад усяго сэрца хочацца пажадаць пачынаючаму майстру творчых поспехаў і багатага плёну!
|